Mərkəzi Bankın dəstəyi ilə növbəti maliyyə savadlılığı müsabiqəsi keçirilmişdir

  • 1 May 2019
  • 33 baxış

Azərbaycan Respublikasının Mərkəzi Bankı Prezidentin 2016-cı il 6 dekabr tarixli Fərmanı ilə təsdiqlənmiş “Maliyyə xidmətlərinin inkişafına dair Strateji Yol Xəritəsi”ndə prioritet istiqamət kimi müəyyənləşdirilmiş “Maliyyə bazarı iştirakçılarının bilik və bacarıqlarının artırılması” hədəfinin icrası ilə bağlı tədbirlərin dəstəklənməsini cari ildə də davam etdirir.

 

Mərkəzi Bank, Təhsil Nazirliyi, Gənclər Fondunun dəstəyi və Azərbaycan Gənclərinin Nailiyyəti İctimai Birliyinin təşkilatçılığı ilə 26 aprel 2019-cu il tarixində Bakı Konqres Mərkəzində “Ağıllı Büdcə” layihəsi çərçivəsində öyrədici rəsmli divar elanı - poster müsabiqəsi keçirilmişdir. Tədbirin əsas məqsədi şagirdlərin maliyyə savadlılığı üzrə mövzuları ictimaiyyətə tanıtmaq üçün poster üzərinə köçürərək təqdim etmələrini, onların yaradıcı düşüncələrinin inkişafını, ümumilikdə onlar arasında maliyyə savadlılığını təşviq etməkdən ibarət olmuşdur.

 

İki mərhələdə keçirilən layihənin ilkin mərhələsində 300 şagird interaktiv büdcə planlaşdırılması, ona nəzarət, gəlir, xərc və qənaət kimi anlayışlarla daha dərindən tanış olmuş, bu mövzuda praktiki bacarıqlarını artırmışlar. Növbəti mərhələdə isə 23 komandadan ibarət 168 şagird posterlərlə müsabiqədə iştirak etmişdir. Komandalar büdcə, bank, bank kartları, vergi, sığorta və s. mövzularda əldə etdikləri bilik və bacarıqları nümayiş etdirmək üçün posterlər hazırlamışlar.

 

İsveçrə Əməkdaşlıq Təşkilatının Cənubi Qafqaz üzrə Nümayəndəliyi, Təhsil Nazirliyi, Mərkəzi Bankın əməkdaşlarından və müstəqil ekspertlərdən ibarət münsiflər heyəti təqdim olunmuş posterləri kreativ düşüncə, mesajın aydınlığı və təqdim etmə qabiliyyətinə görə qiymətləndirərək 3 ən yaxşı poster hazırlayan komandanı müəyyənləşdirmişlər. Qalib komandalara sertifikatlar və hədiyyələr təqdim olunmuşdur. 

 

Mərkəzi Bank tərəfindən müxtəlif hədəf qruplarının maliyyə savadlılığının artırılması məqsədilə maarifləndirmə və təbliğat-təşviqat tədbirlərinin keçirilməsi, o cümlədən bu istiqamətdəki təşəbbüslərin dəstəklənməsi gələcəkdə də davam etdiriləcəkdir.